Lajme flash
Presidenti i qetësisë dhe stabilitetit institucional, Alfred Moisiu mbush sot 96 vjeç
1 Dhjetor 2025, 13:22 / JETË
Ish-presidenti i Shqipërisë Alfred Moisiu, sot më 1 dhjetor, mbush plot 96 vjeç.
Alfred Moisiu u lind më 1 dhjetor 1929. Ai është një nga figurat më të respektuara të shtetit shqiptar.
Me formim të thellë ushtarak, Moisiu u edukua në akademitë më prestigjioze të kohës në Bashkimin Sovjetik, duke u specializuar në inxhinieri ushtarake.
Pas viteve ’90, ai u shqua si një zë profesional e i paanshëm në proceset e reformimit të Forcave të Armatosura dhe si një figurë që promovonte dialogun politik. Më 2002–2007 shërbeu si President i Republikës, periudhë në të cilën ai mbajti profil institucional, larg polemikave, duke fituar reputacion si “presidenti mbi palët”.
Mandati i tij u vlerësua për qasjen e ekuilibruar, mbështetjen për integrimin euroatlantik dhe rolin konstruktiv në skenën politike. Edhe pas përfundimit të mandatit, Alfred Moisiu ka mbetur i pranishëm në jetën publike shqiptare si një zë i arsyes dhe i kujtesës institucionale, duke komentuar me maturi mbi çështjet e sigurisë, shtetit ligjor dhe demokracisë.
Sot, në ditëlindjen e tij, Alfred Moisiu kujtohet si simbol i maturisë dhe stabilitetit, një president që la gjurmë për stilin e tij të qetë, të matur dhe institucional.
Biografia
U lind më 1 dhjetor 1929 në Shkodër, i biri i Spiro Koxhobashit. Më 1941 - 1945 ndoqi gjimnazin e Tiranës. Më 1946 - 1948 ndoqi shkollën e Inxhinierisë Ushtarake të Bashkimit Sovjetik. Më 1949 - 1951 qe instruktor në Akademinë Ushtarake "Skënderbej".
Më 1958 - 1966 qe oficer në Drejtorinë e Xhenios të Ministrisë së Mbrojtjes.
Më 1966 - 1971 u caktua komandant i Brigadës së "Urave të Rënda" në Kavajë. Më 1971 - 1981 qe drejtor i Xhenios dhe i Fortifikimit në Ministrinë e Mbrojtjes. Më 1981 - 1982 qe zëvendësministër i Mbrojtjes dhe më pas komandant i Kompanisë së Xhenios në Burrel deri më 1984. Më 1985 deri më 1991 nxirret në pension. Më 1991 - 1992 u emërua ministër i Mbrojtjes.
Më 1992 - 1994 qe këshilltar i ministrit të Mbrojtjes, Safet Zhulali.
Më 1994 - 1997 zëvendësministër për Politikën e Mbrojtjes dhe po nga 1994 deri më 2002 president i Shoqatës Shqiptare të Atlantikut. Rinxirret në pension më 1997 deri më 2002, kur dhe u zgjodh President i Republikës nga parlamenti më 24 qershor dhe mori detyrën më 24 korrik duke zëvendësuar Rexhep Meidanin. Këtë funksion Moisiu e ushtroi deri më 24 korrik 2007, kur kreun e shtetit e mori presidenti Bamir Topi i zgjedhur nga Kuvendi i Shqipërisë më 20 korrik 2007.
Është autor i mjaft shkrimeve, artikujve dhe studimeve të botuara në shtypin shqiptar e të huaj, për problemet e artit ushtarak, të politikës së mbrojtjes e të sigurisë rajonale si dhe për zhvillimet në Kosovë.
Po ndodh...
Karmën nuk e ndalon dot Sali Berisha!
Nga Bato Kosova
ide
top
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128