Lajme flash
Kur regjimi provokon dhe opozita saboton, Qytetari duhet të qëndrojë!
22 Qershor 2026, 13:53 / IDE
Tri javë protestë. Tri javë shpresë. Tri javë përpjekje për të zgjuar një komb që për shumë vite është mësuar të durojë. Dhe pikërisht tani, kur protesta po hyn në fazën më delikate, sulmi ndaj saj po vjen nga të gjitha anët.
Nga qeveria dhe propaganda e saj. Nga opozita e vjetër që ka frikë nga e reja. Nga patronazhistët, spiunët, provokatorët, policët e infiltruar dhe çdo interes që trembet nga një qytetar i zgjuar dhe i lirë. Historia na mëson se kur pushteti nuk mund ta ndalë një lëvizje, përpiqet ta devijojë atë. Kështu lindin provokimet. Kështu lindin incidentet. Kështu lindin skenarët.
Dje ishte flamuri i Izraelit, pastaj ishte Osman Stafa. Nesër do të jetë një tjetër ngjarje që do të përpiqet të largojë vëmendjen nga pyetja kryesore:
Pse protestojnë shqiptarët?
Mos u mashtroni.
Kur debati largohet nga korrupsioni, varfëria, kapja e shtetit, largimi i rinisë dhe mungesa e shpresës, atëherë dikush po e shtyn me forcë protestën në një rrugë pa krye.
Historia shqiptare ka parë edhe më parë provokime të fabrikuara për të justifikuar represionin. Prandaj qytetari duhet të jetë i mençur, i qetë dhe vigjilent.
Tre të vërteta që nuk ndryshojnë:
Një provokim mund të ndezë një natë, por nuk mund të ndalë një popull.
Një regjim mund të blejë heshtje, por nuk mund të blejë ndërgjegje.
Një opozitë mund të zhgënjejë, por nuk mund të vrasë shpresën e qytetarëve.
Sot Rama dhe Berisha kanë një frikë të përbashkët. Jo njëri-tjetrin. Kanë frikë qytetarin që nuk bindet më. Kanë frikë të riun që nuk shitet. Kanë frikë protestën që nuk kontrollohet. Prandaj sulmojnë. Prandaj përçajnë. Prandaj shpifin. Prandaj provojnë çdo ditë ta lodhin dhe ta çorientojnë protesten.
Por një gjë tashmë ka ndodhur dhe nuk kthehet më pas. Ndërgjegjësimi qytetar.
Ky është fitorja më e madhe e kësaj proteste.
Regjimi është diskredituar para botës. Miti i paprekshmërisë është thyer. Frika ka ndryshuar kamp. Dhe kjo është arsyeja pse sot nervozizmi është në pushtet, jo në shesh.
Mos lejoni askënd t’ju përdorë. Mos lejoni askënd t’ju provokojë. Mos lejoni askënd t’ju vjedhë kauzën. Mbani lart vetëm Flamurin Kombëtar dhe kërkesën për ndryshim. Sepse beteja nuk është për një parti. Nuk është për një lider. Nuk është për një mikrofon.
Është për Shqipërinë.
Dhe pyetja që sot rri pezull mbi çdo shqiptar është kjo: Cila është rruga që duhet të marrë protesta për të fituar?
Këtë nuk mund ta vendosë as Rama, as Berisha. Këtë mund ta vendosin vetëm qytetarët e lirë.
Po ndodh...
Ik Sali të bjerë Rama
Nga Bato Kosova
ide
top
receta Alfa
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128