Lajme flash
Kasta e korruptuar/ Gazeta belge De Morgen: Protestuesit në Shqipëri kërkojnë largimin e kryeministrit, por edhe të Berishës
30 June 2026, 20:52 / POLITIKË
Ajo që nisi gati një muaj më parë si kundërshtim ndaj një projekti të madh ndërtimi në bregdet nga vajza dhe dhëndri i presidentit amerikan Trump, është shndërruar në një protestë të përditshme kundër mënyrës autoritare të qeverisjes së kryeministrit Rama.
Ky i fundit, megjithatë, deri tani nuk ka dhënë asnjë shenjë tërheqjeje apo lëshimi.
Shkrimi i plotë
Është një pamje prekëse: fëmijë që vizatojnë flamingo në rrugë, ndërsa prindërit e tyre mbajnë në ajër zogj të prerë prej druri. Në pankartat e protestës lexohet, ndër të tjera: “Shqipëria nuk është në shitje.”
“Në Shqipëri merren vendime pa pasur ne asnjë fjalë,” thotë aktivistja e mjedisit Anisa Kulla (40). “Nën petkun e investimeve strategjike, natyra jonë po u shitet kompanive për të cilat nuk dimë as se kush janë.”
Flamingoja është një nga speciet që, sipas aktivistëve, rrezikohet nëse realizohen planet e Jared Kushner dhe Ivanka Trump për ndërtimin e një resorti luksoz në një zonë të mbrojtur të bregdetit shqiptar. Kur një muaj më parë buldozerët nisën të punonin në plazh, protestuesit zgjodhën pikërisht flamingon rozë si simbol të tyre në protestën e zhvilluar në Tiranë. E gjithë bota tashmë ka dëgjuar për “revolucionin e flamingove”, edhe falë faktit se protestuesit po përballen me familjarë të një prej njerëzve më të fuqishëm në botë.
Pas gati një muaji, mijëra njerëz vazhdojnë të dalin çdo mbrëmje në rrugët e Tiranës, por flamingot tashmë janë në pakicë. Në vend të tyre shihen kryesisht flamuj shqiptarë, që valëviten në shtiza ose mbështillen rreth supeve të protestuesve. Protesta ka tejkaluar kufijtë e aktivizmit mjedisor dhe është shndërruar në një lëvizje më të gjerë, ku marrin pjesë qytetarë të zemëruar nga bindje të ndryshme politike, të cilët nuk protestojnë domosdoshmërisht vetëm për mbrojtjen e natyrës.
“Situata në Shqipëri është aq e keqe, sa pothuajse çdo familje ka disa anëtarë që jetojnë jashtë vendit,” thotë Anesti Gjikoka (38), zhvillues uebi, i cili mban një flamur shqiptar rreth qafës. “Prona jonë, toka jonë, po na merret me dokumente të falsifikuara. Kjo duhet të marrë fund.”
Ky është një problem që prek gjithë Shqipërinë. Gjatë regjimit komunist pas Luftës së Dytë Botërore, toka dhe pronat u konfiskuan nga shteti. Pas rënies së komunizmit, në fillim të viteve 1990, shumë prona u privatizuan në rrethana të paqarta, pa u kompensuar ose pa dhënë pëlqimin pronarët e ligjshëm. Si pasojë, vendi është përfshirë nga konflikte pronësie dhe mijëra procese gjyqësore. Një pjesë e tokës ku Kushner dhe Trump planifikojnë të ndërtojnë rreth 10 mijë dhoma hoteli është gjithashtu objekt i këtyre mosmarrëveshjeve.
“Ka shumë korrupsion dhe mungesë totale transparence,” shpjegon Hermes Ruçi (20) arsyen pse iu bashkua protestës. “Diçka duhet të ndryshojë.”
Edhe pse protestuesit kanë prejardhje dhe shqetësime të ndryshme, të gjithë drejtojnë kritikat ndaj kryeministrit Edi Rama. Çdo mbrëmje ata mblidhen përpara zyrës së tij, duke kërkuar dorëheqjen dhe duke brohoritur që ai të përfundojë në burg.
Ndërkohë, Rama nuk ka ndryshuar qëndrim. Ai i akuzon protestuesit për mungesë informacioni, mediat për përhapje dezinformimi dhe Iranin për nxitjen e protestave. Pa bërë publike detajet e marrëveshjes, ai nuk ka ndërmend ta anulojë projektin me Kushner dhe Trump.
Megjithatë, kundërshtarët nuk e kanë humbur shpresën se resorti nuk do të ndërtohet. Prokuroria e Posaçme kundër Korrupsionit ka nisur një hetim për shitjen e tokës. Parlamenti Evropian ka kërkuar pezullimin e përkohshëm të ndërtimit, ndërsa Komisioni Evropian ka deklaruar se pret që Shqipëria, si vend kandidat për anëtarësim në Bashkimin Evropian, të respektojë legjislacionin evropian për mbrojtjen e mjedisit.
Për më tepër, Kushner dhe bashkëshortja e tij mund të vendosin të tërhiqen nga projekti, ashtu siç ndodhi më parë në Beograd, ku ai hoqi dorë nga planet për ndërtimin e një Trump Tower pas protestave dhe një hetimi për korrupsion.
Për shumicën e protestuesve të mbledhur para zyrës së Ramës, kjo është dytësore. Ata duan që Rama të largohet nga pushteti pas trembëdhjetë vitesh në qeverisje. Megjithatë, as alternativa kryesore opozitare nuk i bind: liderin e opozitës, Sali Berisha, ish-kryeministër dhe ish-president, i cili gjithashtu përballet me akuza për korrupsion, ata nuk e konsiderojnë aspak më të mirë.
“Kjo nuk ka shumë rëndësi për momentin,” thotë studenti Hermes Ruçi. “Ne duam të ndryshojmë të gjithë sistemin. Pastaj do të vijë edhe një qeveri e mirë.”
Edhe aktivistja Anisa Kulla nuk ka një përgjigje të gatshme: “E dimë se ky është një proces i gjatë. Por kjo është hera e parë në historinë tonë që kemi protestuar çdo ditë për një muaj të tërë pa asnjë akt dhune. Grupe të ndryshme, me prejardhje të ndryshme, por me një qëllim të përbashkët: Rama duhet të largohet. Rezultati më i rëndësishëm është se njerëzit janë zgjuar nga apatia.”/Përktheu Alfapress.al, marrë nga De Morgan
Po ndodh...
ide
Nuk bëhet Shqipëria e re, me Shqipërinë e vjetër!
Nga Roland Bejko
Nuk mund të jesh engjëll nëse mbron djallin...
Nga Indrit Gjyzeli
top
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128