English
Luaj me Fjalëkryq
Lajme flash

Rama: Shqipëria hapi dyert për afganët kur të tjerët i mbyllën

5 Dhjetor 2025, 22:13 / POLITIKË ALFA PRESS

Rama: Shqipëria hapi dyert për afganët kur të tjerët i

Kryeministri Edi Rama deklaroi sot, në Ditën Ndërkombëtare të Vullnetarizmit, se Shqipëria tregoi me afganët se madhësia e shpirtit nuk matet nga madhësia gjeografike apo ekonomike.

I pranishëm në ceremoninë e 10-vjetorit të nismës vullnetare “Fundjavë Ndryshe”, Rama tha se vendi ynë i hapi dyert afganëve, kur të tjerët i mbyllën.

“Bamirësia nuk është një gjest, as një ngjarje. Është disiplinë”, u shpreh ai, duke shtuar se bujaria e vërtetë nuk lidhet me dhënien e asaj që të tepron, por me vullnetin për t’u hapur ndaj tjetrit dhe për ta parë si pasqyrë të vetes.

Në vijim, Rama solli në vëmendje një ndër sfidat e kohëve të fundit, si rasti i strehimit të qytetarëve afganë, duke theksuar se Shqipëria zgjodhi të vepronte me humanizëm në një moment kur shumë vende të tjera nuk e morën atë hap.

Ai tha se vendi ynë tregoi se madhësia e shpirtit nuk matet nga madhësia gjeografike apo ekonomike, por nga gatishmëria për të ndihmuar.

“Ishte një moment kur Amerika i la pas, duke tërhequr me vete gjithë NATO-n. Të gjithë ata të cilët i kishte nxjerrë nga errësira me një premtim të madh, me premtimin se me ardhjen e Amerikës dhe NATO-s në Afganistan gjithçka do të ndryshonte në jetën e tyre.

Dhe përnjëherë, sa hap e mbyll sytë, gjithçka mbaroi për ata njerëz.

Aty unë kam parë një Amerikë tjetër. Kam kuptuar forcën e jashtëzakonshme të atij vendi, kur njerëz nga më të ndryshmit, që në jetën e tyre të përditshme jetojnë në kampe të ndryshme, siç jeni ju këtu sot, u bënë bashkë.

Dhe vinin telefonata të çuditshme, kërkonin ndihmë, kërkonin ndihmë këtu nga Shqipëria, sepse ne u bëmë i vetmi vend që hapi dyert për afganët, të cilët, për ta thënë deri në fund, ishin shumë myslimanë për të qenë të mirëpritur në shumë vende të tjera të NATO-s, ose nuk ishin aq barrë sa duhej.

Ndërkohë që ne e bëmë këtë akt dhe shumë të tjerë u përfshinë bashkë me shtetin, pikërisht për atë që thashë më parë, sepse tek ata që papritur e kuptuan se kishin mbetur në mëshirën e një turme vrasësish, ne pamë pasqyrën ku reflektohej shpirti ynë.

Dhe shpirti ynë, pavarësisht se jemi ndër vendet më të vogla dhe më pak të pasura të NATO-s, nuk mund të ishte më i vogël se shpirti i atyre që mund të jenë më të pasur e më të mëdhenj se ne”, deklaroi Rama.

Kryeministri vlerësoi rolin e Fondacionit “Fundjavë Ndryshe”, duke e cilësuar si një institucion moral të shoqërisë shqiptare që ka ngritur “zakonet e zemrës” dhe ka krijuar një kulturë të re solidariteti, ku shpresa dhe bamirësia ecin dorë për dore dhe ndikojnë në të gjitha dimensionet e jetës komunitare.

Rama theksoi rëndësinë e vazhdimësisë së kësaj nisme, duke shprehur vlerësim të veçantë për themeluesin e saj, Arbër Hajdari, dhe për të gjithë vullnetarët që prej 10 vitesh kontribuojnë pa rezervë.

“‘Fundjava Ndryshe’ është një palestër e shpresës dhe një trajner i disiplinës së bamirësisë”, tha ai, duke nënvizuar se vetëm përmes stërvitjes së shpresës dhe disiplinës së bamirësisë shoqëria mund të ndërtojë mirësi të qëndrueshme dhe besim në të ardhmen.

Po ndodh...

Dua të lexoj më shumë lajme

ide

top

receta Alfa

TRENDING

shërbime

  • POLICIA129
  • POLICIA RRUGORE126
  • URGJENCA112
  • ZJARRFIKESJA128