English
Luaj me Fjalëkryq
Lajme flash

Trash apo Treasure?/ Ka fotografi që vlejnë sa një histori

14 Qershor 2026, 18:22 / IDE NGA ALBERT ZADRIMA
Trash apo Treasure?/ Ka fotografi që vlejnë sa një histori

TRASH APO TREASURE?

Ka fotografi që vlejnë sa një libër historie. Kjo pankartë nuk kërkon shumë shpjegime. Në njërën anë janë ata që shkruan historinë e kombit shqiptar. Në anën tjetër janë ata që kanë shkruar historinë e tranzicionit shqiptar. Djathtas shfaqen burrat që ndërtuan identitetin tonë kombëtar:

Gjergj Kastrioti Skënderbeu, simboli i rezistencës europiane dhe i mbijetesës shqiptare. Një emër që e ngriti kombin mbi frikën dhe e bëri të pavdekshëm. Ismail Qemali, njeriu që ngriti flamurin e pavarësisë dhe e riktheu Shqipërinë në hartën e botës. Luigj Gurakuqi, mendja e ndritur që ndërtoi arsimin, shtetin dhe kulturën politike shqiptare. Isa Boletini, luftëtari që e kuptoi se liria nuk dhurohet, por fitohet. Adem Jashari, sakrifica që i tregoi botës se shqiptari mund të vritet, por nuk mund të nënshtrohet.

Këta nuk kërkuan privilegje. Nuk kërkuan poste. Nuk kërkuan tendera. Nuk kërkuan propagandë.

Ata lanë pas histori.

Në anën tjetër majtas, qëndrojnë figurat që simbolizojnë 35 vitet e tranzicionit shqiptar. Vite korrupsioni. Vite arrogancë pushteti. Vite konfliktesh sterile. Vite emigracioni masiv. Vite kapjeje institucionesh. Vite premtimesh të pambajtura.

Vite ku Shqipëria humbi miliona bij e bija të saj nëpër botë.

Nuk ka rëndësi renditja. Nuk ka rëndësi partia. Nuk ka rëndësi ngjyra politike. Sepse problemi nuk është një individ. Problemi është një model që ka konsumuar energjinë e një kombi të tërë. Dhe pikërisht këtë model po sfidon sot rinia shqiptare.

Ky është lajmi i madh. Jo emrat, jo sloganet, jo pankartat.

Por fakti që një brez po zgjohet dhe po kërkon të drejtën për të marrë në dorë fatin e vet. Sepse historia na mëson një gjë:

Kombet nuk shkatërrohen kur u mungojnë heronjtë. Kombet shkatërrohen kur u mungon guximi.

“Historia nuk pyet sa vite qeverise. Historia pyet çfarë le pas”.

“Një komb nuk ecën përpara duke adhuruar pushtetin, por duke kontrolluar pushtetin.”

“Kur rinia zgjohet, frika fillon të ndryshojë krah.”

Morali: Mos i shikoni këta të rinj me dyshim. Mos i shikoni me përçmim. Mos i shikoni me frikë.

Mbështetini.

Sepse ata që guxojnë sot të protestojnë, nesër do të guxojnë edhe të votojnë. Dhe nëse një ditë zhgënjehen nga ata që do të vijnë pas, do t’i largojnë edhe ata. Kjo është demokracia. Kjo është shpresa. Kjo është forca e një kombi të lirë. Ndaj thirrja ime për çdo shqiptar, në Shqipëri, Kosovë, Mal të Zi, Maqedoni, Çamëri e diasporë është e thjeshtë:

Mos rrini spektatorë të historisë. Bëhuni pjesë e saj. Sepse ka momente kur një popull duhet të zgjedhë.

 

Po ndodh...

Dua të lexoj më shumë lajme

ide

top

receta Alfa

TRENDING

shërbime

  • POLICIA129
  • POLICIA RRUGORE126
  • URGJENCA112
  • ZJARRFIKESJA128