Lajme flash
Energjia, sa të varur jemi nga importi? Shqipëria, ndër vendet me varësinë më të ulët energjetike në rajon
13 Mars 2026, 19:22 / EKONOMI&SOCIALE
Të dhënat e Agjencisë Europiane të Statistikave (Eurostat) mbi varësinë nga importet e energjisë tregojnë se gjatë vitit 2024 Shqipëria importoi 27.3% të energjisë që konsumoi. Nëse krahasohet me dy dekada më parë, rezulton se varësia e vendit nga importi është ulur ndjeshëm. Në vitin 2004 kjo varësi ishte 47.8%, çka do të thotë se brenda 20 viteve Shqipëria e ka ulur varësinë energjetike me rreth 20 pikë përqindje, një nga përmirësimet më të mëdha në Europë.
Në Bashkimin Europian, gjatë vitit 2024, shkalla mesatare e varësisë nga importet e energjisë ishte 57%, që do të thotë se mbi gjysma e nevojave për energji u mbuluan nga importet neto. Megjithatë, kjo varësi ndryshon ndjeshëm mes vendeve të BE-së, duke filluar nga 98% në Maltë, 91% në Luksemburg dhe 88% në Qipro, deri në vetëm 5% në Estoni.
Në këtë krahasim, Shqipëria rezulton rreth 30 pikë përqindje më pak e varur nga importi i energjisë sesa mesatarja e BE-së. Ky nivel relativisht i ulët lidhet kryesisht me strukturën e prodhimit energjetik të vendit, e cila mbështetet fort tek hidrocentralet, që prodhojnë pjesën më të madhe të energjisë elektrike në vend.
Edhe në rajonin e Ballkanit, Shqipëria renditet ndër vendet me varësinë më të ulët nga importi i energjisë. Në vitin 2024, Serbia kishte një varësi prej 40.8%, Maqedonia e Veriut 65.3%, ndërsa Mali i Zi 33% dhe Bosnje Hercegovina 27.8%. Me 27.3%, Shqipëria është pothuajse në të njëjtin nivel me Bosnjen dhe më mirë se shumica e vendeve të rajonit.
Megjithatë, sistemi energjetik i vendit mbetet shumë i varur nga kushtet klimatike, pasi prodhimi kryesor vjen nga hidrocentralet. Në vitet me reshje të pakta, prodhimi vendas bie dhe vendi detyrohet të rrisë importet e energjisë.
Për këtë arsye, investimet në energjinë diellore, erën dhe diversifikimin e burimeve konsiderohen thelbësore për të ruajtur dhe përforcuar pavarësinë energjetike në vitet e ardhshme./SCAN
Po ndodh...
ide
top
receta Alfa
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128