Lajme flash
Kimish bën 100: Tani dua titullin me Gjermaninë
3 Qershor 2025, 16:01 / SPORT
Joshua Kimish përballet me një moment të veçantë në gjysmëfinalen e Ligës së Kombeve të mërkurën kundër Portugalisë (ora 21:00). Kapiteni i DFB-së do të bëjë paraqitjen e tij të 100- të ndërkombëtare për ekipin kombëtar gjerman dhe do ta bëjë në “dhomën e tij të ndenjjes” në Mynih! Përpara ndeshjes së 20-të kundër portugezëve, 30-vjeçari Kimish ka folur për këtë moment dhe dëshirën e tij për të fituar një titull me “Nationalmannschaft”-in.
NDESHJA E 100-TË ME GJERMANINË – “Kjo do të thotë shumë për mua. Është një nder i madh që kam luajtur kaq shumë ndeshje për Gjermaninë. Tregon se ke luajtur në një nivel mjaft të mirë gjatë nëntë deri në dhjetë viteve të fundit. Kam pasur fatin që nuk kam pësuar shumë dëmtime. Shpresoj të luaj edhe disa ndeshje të tjera. Kjo është diçka për të cilën duhet të jem shumë, shumë krenar. Është diçka shumë e veçantë, diçka vërtet unike. Por duhet të jetë e veçantë për çdo lojtar të luajë për Gjermaninë, pavarësisht nëse është ndeshja e dhjetë, e 100- të apo e 150-të”.
NDESHJET E VEÇANTA – “Ndeshja kundër Spanjës është ende shumë e freskët në mendjen time, sepse kishim ndjesinë se mund të arrinim diçka. Herën e fundit që e patëm këtë ndjesi ishte në vitin 2016 në Francë. Ne luajtëm një turne shumë të mirë atje dhe ishim skuadra më e mirë, përsa u përket aftësive të lojës. Këto janë dy ndeshjet që më vijnë ndërmend. Fatkeqësisht, ato ishin mundësi të humbura. Kam kujtime pozitive nga finalja e Kupës së Konfederatave kundër Kilit, të cilën e fituam”.
ROLI SI LIDER – “Në dhomën e zhveshjes dhe jashtë fushës, jam shumë komunikues dhe kam një marrëdhënie të mirë me të gjithë. Në fushë, herë pas here bëhem emocional dhe ndonjëherë mund të bëhem edhe i zhurmshëm. Pastaj përpiqem t’i kanalizoj këto emocione në diçka pozitive, gjë që nuk funksionon gjithmonë. Por përpiqem t’i ndihmoj shokët e mi të ekipit për t’u dhënë atyre shansin më të mirë të mundshëm për sukses”.
SYNIMET – “Kohët e fundit kemi pasur disa turne të pasuksesshme. Kupat e Botës në veçanti ishin të pasuksesshme. Tani duam të përpiqemi të bëjmë më mirë. Në Kampionatin e fundit Europian, siguruam që të kishte përsëri një lidhje midis ekipit dhe vendit, që të kishte eufori, që ekipi kombëtar të ngjallte përsëri ndjenja pozitive. Nëse kjo do të jetë e mjaftueshme për të fituar një titull të madh, nuk e dimë. Kjo varet nga shumë faktorë, janë gjërat e vogla që kanë rëndësi. Duhet të shkojmë në turneun e vitit të ardhshëm të përgatitur mirë. Përgatitjet për Kupën e Botës nuk fillojnë dy javë më parë, ato kanë filluar tashmë. Tani duam të luajmë dy ndeshje të mira ndërkombëtare dhe të tregojmë se jemi në rrugën e duhur”.
ETJA PËR TITUJ – “Deri më tani, kam përjetuar shumë ngritje dhe ulje me ekipin kombëtar gjerman. Si ekip kombëtar gjerman, shkon në çdo turne për të fituar titullin. Por duhet të përqendrohemi në gjërat që mund të ndikojmë. Jemi ende disi larg Kupës së Botës, por kemi Ligën e Kombeve që po afron, ku mund të fitojmë një titull disi më të vogël. Kjo do të ishte e rëndësishme për ne si ekip, për procesin tonë, zhvillimin tonë. Që të fitojmë vetëbesim, që të mund të mposhtim edhe kombet kryesore”.
RECETA PËR SUKSES – “Është shumë e rëndësishme për mua të fle mjaftueshëm. Shkoj në shtrat herët sepse, për fat të keq, duhet të zgjohem herët. Përveç kësaj, është shumë kujdes për veten, duke investuar në trupin tim. Gjithashtu i besoj stafit, i cili kujdeset për shëndetin, ushqyerjen dhe rikuperimin tonë. Kur luan shumë ndeshje, duhet të bësh shumë. Nëse do të performosh çdo tri ditë, duhet të punosh shumë me veten midis ndeshjeve”.
Po ndodh...
Amerika mund të tërhiqet nga Europa, por jo nga SPAK
Nga Gentian Gaba
ide
top
receta Alfa
TRENDING 
shërbime
- POLICIA129
- POLICIA RRUGORE126
- URGJENCA112
- ZJARRFIKESJA128