Zgjedhjet në Himarë, PD cakton Petro Gjikurinë si kandidat për kryebashkiak

10 Korrik 2024, 17:16 / POLITIKË ALFA PRESS

Zgjedhjet në Himarë, PD cakton Petro Gjikurinë si kandidat
Petro Gjikuria do të jetë kandidati i PD për Kryebashkiak të Himarës, në zgjedhjet e pjesshme që do të mbahen në 4 gusht.

Petro Gjikuria jeton në Uashington dhe është pjesë e “Federatës Panepirote të Amerikës”.

Ai është mbështetës i zjarrtë i çështjes së Belerit, dhe siç ka deklaruar, lufton për të drejtat e minoritetit grek në Shqipëri.

Biznesmeni shqiptaro-amerikan Petro Gjikuria do të garojë përballë Vangjel Tavos, kandidatit të propozuar nga Partia Socialiste.

Zgjedhjet në Bashkinë e Himarës do të mbahen më 4 gusht ndërsa sipas projektvendimit të KQZ, kandidatët do të kenë në dispozicion, vetëm 1 javë kohë për të organizuar fushatën e tyre.

Zgjedhjet për Himarën do të zhvillohen pasi kryetari i zgjedhur në 14 maj të 2023, Fredi Beleri u dënua me vendim të formës së prerë me 2 vite burg për korrupsion në zgjedhje.

Beleri nuk arriti të marrë zyrtarisht detyrën e Kryebashkiakut, pasi nuk u lejua të betohet para Këshillit Bashkiak, ndërsa ishte në gjykim në GJKKO.